Fyrirspyrjandi (Anna Kristín Gunnarsdóttir):
Frú forseti. Þessi fyrirspurn mín kemur í skemmtilegu framhaldi af því máli sem hér var til umræðu áðan og fékk svo góðar undirtektir sem raun ber vitni.
Orðið aukabúgrein kemur oft fyrir í umræðum um stöðu landbúnaðarins og er gjarnan notað um eitthvað sem bændur geti hallað sér að í þrengingum sínum. Mér leikur því forvitni á að fá frekari upplýsingar um hvað hér sé að ræða og hversu miklar upplýsingar liggi fyrir hjá ráðuneyti landbúnaðarins um þessi störf.
Ég spyr því hæstv. landbrh.:
1. Hvernig eru svokallaðar aukabúgreinar í landbúnaði skilgreindar?
2. Hvaða aukabúgreinar njóta fastra styrkja úr ríkissjóði og um hvaða fjárhæðir er að ræða?
3. Hefur ráðherra í hyggju að móta skýrar reglur um aukabúgreinar og efla stuðning við þær?