[prenta uppsett í dálka] 81. fundur, 130. lþ.
Heilbrigðisráðherra (Jón Kristjánsson):
Virðulegi forseti. Hv. fyrirspyrjandi tekur nokkuð upp í sig með því að segja að ekkert hafi verið gert. Þessi mál voru tekin upp fyrir tveimur árum eftir að þau höfðu legið í láginni áður. Það var skipuð nefnd þriggja ráðuneyta í málið sem vann ítarlega skýrslu um það. Nefndin skilaði til mín tillögum og það vantar ekkert ákvarðanir í þessu máli. Við höfðum skrifað Landspítalanum á sínum tíma, falið honum að útfæra tillögur nefndarinnar sem voru hreinlega um það að deildin yrði í tengslum við eða hluti af stærstu geðdeild landsins, sem hefur á að skipa flestu fagfólki á þeim forsendum að starfsemin væri þess eðlis. Það er mjög margbrotin starfsemi sem þarna þarf að fara fram. Hún kemur inn á verksvið þriggja ráðuneyta þannig að þetta er í rauninni mjög flókið verkefni. Eigi að síður hefur verið unnið stöðugt að því. Ég vonast til og veit reyndar að tillögur spítalans eru á lokastigi og ég mun vonandi fá þær á mitt borð í þessum mánuði.
