Jónína Bjartmarz (andsvar):
Frú forseti. Ég vil í örfáum orðum taka undir með hv. þm. Magnúsi Þór Hafsteinssyni varðandi það sem hann sagði um áhersluna á Vestur-Norðurlöndin. Þetta hefur og er orðið eitt af áherslumálunum og eins og ég veit að hv. þm. veit og þekkir, hefur áherslan í Norðurlandasamstarfinu á undanförnum tíu árum meira og minna verið í austur og á samstarf og stuðning við Eystrasaltsríkin sem eru núna að ganga inn í ESB.
Varðandi áhersluna á Vestur-Norðurlöndin, er grunnurinn að þeirri vinnu sem núna fer fram úttekt og skýrsla sem norræna ráðherranefndin lét gera um hverju skyldi forgangsraða þar og hvaða leiðir og áherslur skyldi hafa í því samstarfi. Ég veit ekki hvort hv. þm. er kunnugt um að það var hv. fyrrv. þm., Ísólfur Gylfi Pálmason, sem upphaflega átti hugmyndina í flokkahópi miðjumanna innan Norðurlandaráðsins. Þaðan kom vinnan og tilmæli til ráðherranefndarinnar í gegnum Norðurlandaráðsþing um að þetta skyldi sett í öndvegi og í framhaldi af því var skýrslan unnin.
Hins vegar sýnist mér nokkuð einsýnt að þennan Vestur-Norðurlandavagn þurfa Íslendingar og fulltrúar í Íslandsdeild Norðurlandaráðsins að vera nokkuð öflugir að draga vegna þess að eðlilega eru það kannski þau lönd, við, Vestur-Noregur, Færeyjar og Grænland sem hafa meiri áhuga á því en mörg önnur. Ég vil því láta þess getið að fulltrúarnir í Íslandsdeild Norðurlandaráðsins hafa upp til hópa allir verið mjög öflugir í því að tala fyrir auknu svæðasamstarfi á Vestur-Norðurlöndunum og áherslunum þar og þar með fyrir sjálfbærri nýtingu hafsins og auðlinda og öðrum málum sem eru sett í forgang í þeirri vinnu.