[prenta uppsett í dálka] 89. fundur, 130. lþ.
Félagsmálaráðherra (Árni Magnússon) (andsvar):
Hæstv. forseti. Ég þakka hv. þm. Þuríði Backman fyrir spurningar hennar og þann stuðning við málið sem ég taldi felast í ræðu hennar.
Ég vil svara því skýrt að það er ekkert í þessu máli sem hér er til umfjöllunar sem lýtur að því að gera breytingar á starfsemi Íbúðalánasjóðs, alls ekki. Ég vil, með leyfi forseta, vitna til stefnuyfirlýsingar ríkisstjórnarinnar frá 23. maí. Þar segir orðrétt:
,,Að haldið verði áfram endurskipulagningu á húsnæðismarkaði í samræmi við markmið um Íbúðalánasjóð. Lánshlutfall almennra íbúðalána verði hækkað á kjörtímabilinu í áföngum í allt að 90% af verðgildi eigna, að ákveðnu hámarki.``
Þarna kemur fram sú stefnumörkun ríkisstjórnarinnar í stefnuyfirlýsingunni, að við höldum áfram húsnæðislánakerfi okkar innan vébanda Íbúðalánasjóðs. Það mál sem hér er til umfjöllunar gerir alls ekki ráð fyrir neinni breytingu þar á. Þvert á móti er gert ráð fyrir að við viðhöldum í grunninn því kerfi sem við höfum byggt upp með ágætum árangri.
