Kristinn H. Gunnarsson:
Herra forseti. Ég minni á að fyrstu hugmyndir um málið sem spurt er um í fyrirspurninni komu fram í byggðaáætlun sem stjórn Byggðastofnunar tók saman árið 1997 og sendi hæstv. forsrh. Sú tillaga var borin fram á Alþingi í framhaldinu og samþykkt í þingsölum árið 1998. Málið kom því fram fyrir sex árum í þinginu og þingið hefur afgreitt það af sinni hálfu með pólitískri yfirlýsingu um stuðning við þetta mál.
Ég hvet því hæstv. ríkisstjórn til aðgerða í þessum efnum. Ég vil frekar athafnir en orð á þessari stundu. Við höfum nógu lengi rætt þetta mál og og oft glímt við mál sem ekki hafa verið mjög einföld í framkvæmd. Það er ekki einfalt að setja 3,5 milljarða kr. úr ríkissjóði til atvinnuuppbyggingar á Reykjavíkursvæðinu í gegnum tónlistarhús. Það er umdeilt mál en við látum okkur hafa það þegar markmiðin eru góð.