[prenta uppsett í dálka] 102. fundur, 130. lþ.
Utanríkisráðherra (Halldór Ásgrímsson) (andsvar):
Herra forseti. Ég get því miður, hv. þm., ekki fylgst nákvæmlega með því hvernig starf annarra ráðuneyta gengur. Hins vegar getur hv. þm. spurt um það hvenær sem er á Alþingi (Gripið fram í: Við erum að því.) m.a. í óundirbúnum fyrirspurnatímum til hæstv. sjútvrh. sem var hér fyrr í dag og þá hefði hv. þm. verið í lófa lagið að spyrja hæstv. ráðherra um það sem ber ábyrgð á þessu máli.
Ég skal játa að ég er enginn sérstakur áhugamaður um færeyska fiskveiðistjórnarkerfið og tel að það henti ekki aðstæðum okkar. En mér finnst hins vegar sjálfsagt, þó að ég sé enginn sérstakur áhugamaður um það, að þessi úttekt fari fram og fagna því. Hv. þm. getur að sjálfsögðu fengið allar þær upplýsingar um gang þess máls sem hann kýs. En ég vona að hann hljóti að skilja að ég hef ekki á hraðbergi nákvæmar upplýsingar um hvað er að gerast í öðrum ráðuneytum en því sem ég ber ábyrgð á. Og ég veit að hv. þm. mundi skilja það miklu betur ef hann kemst í þá aðstöðu einhvern tímann að verða yfirmaður í ráðuneyti, þá held ég hann hljóti að skilja að það er ekki hægt að reikna með því að aðrir ráðherrar viti nákvæmlega um hvað er að gerast í hinum ráðuneytunum. En hv. þm. getur að sjálfsögðu spurt hæstv. sjútvrh. um þetta hvenær sem hann vill og ég er nokkuð hissa á því að hann skuli ekki hafa gert það, miðað við þann mikla áhuga sem hann hefur á málinu.
