[prenta uppsett í dálka] 104. fundur, 130. lþ.
Menntamálaráðherra (Þorgerður K. Gunnarsdóttir):
Virðulegi forseti. Hv. þm. Lára Stefánsdóttir hefur beint til mín fjórum spurningum um Menntagátt menntamálaráðuneytisins sem lýtur að aðgangi að upplýsingum á netinu svona í megindráttum.
Í fyrsta lagi spyr hv. þm.: ,,Hversu mikið efni hefur verið skráð í Menntagátt menntamálaráðuneytisins?``
Nú þegar eru á Menntagátt um 2.500 skráningar þar sem námsefni er tengt markmiðum námskráa leik-, grunn- og framhaldsskóla. Þetta námsefni er hægt að skoða eftir námsgreinunum og leita að því í gegnum þennan gagngrunn sem er aðgengilegur á gáttinni.
Í öðru lagi spyr hv. þm.: ,,Hvað hefur gerð gáttarinnar kostað nú þegar og hver er áætlaður rekstrarkostnaður á ári?``
Gerð Menntagáttarinnar kostaði 25 millj. kr. Innifalið í stofnkostnaði er rekstur gáttarinnar árin 2003--2005. Á árinu 2003 var sérstaklega varið 10 millj. kr. til sérstakra verkefna á Menntagátt.
Í þriðja lagi spyr hv. þm. Lára Stefánsdóttir: ,,Hvað hefur kostað að láta skrá efni í gáttina?``
Á árinu 2003 var varið um 1 millj. kr. til skráningar efnis á Menntagátt. Áætlað er að verja um 12 millj. kr. til átaks í skráningu og gerð stafræns efnis á árinu 2004.
Í fjórða lagi er spurt: ,,Hversu mikið hafa höfundar fengið greitt fyrir efni sitt?``
Á árinu 2003 voru greiddar 3,7 millj. kr. í styrki til höfunda stafræns efnis á Menntagátt. Ekki eru greidd höfundarlaun til þeirra sem skrá efni sitt á Menntagátt enda er tilgangur skráningarinnar fyrst og fremst að veita upplýsingar um námsefni sem er til staðar og tengist þá markmiðum námskránna sjálfra.
