[prenta uppsett í dálka] 104. fundur, 130. lþ.
Sigurjón Þórðarson:
Frú forseti. Ég vil byrja á að þakka hæstv. landbrh. fyrir að leiðrétta ummæli sem hann viðhafði í haust, en í máli hans nú kom fram að það væri alfarið á ábyrgð innlendra stjórnvalda að herða þessar reglur til sláturhúsanna. En í haust sagði hann orðrétt, þegar ég spurði hann út í svipað atriði: ,,Við stöndum að vísu frammi fyrir því að Evróputilskipun um hvernig sláturhúsin skuli vera gengur hér í gildi 2008.`` En nú er það komið á hreint að þetta er alfarið á ábyrgð íslenskra stjórnvalda.
Það leiðir hugann að því máli sem rætt var hér á undan, þ.e. markaðssetningu íslensks kjöts. Þessi ráðstöfun mun að öllum líkindum hækka sláturkostnað og hækka þann kostnað sem fellur á kjötið, hækka verð til innlendra neytenda og skerða samkeppnisstöðu lambakjötsins á innlendum kjötmarkaði.
