Fyrirspyrjandi (Anna Kristín Gunnarsdóttir):
Frú forseti. Eins og kunnugt er hafa viðræður staðið yfir árum saman innan Alþjóðaviðskiptastofnunarinnar, WTO, þar sem markmiðið er að lækka tolla og innanlandsstuðning á sviði landbúnaðar. Þessar viðræður hafa virkað sem keyri á vestrænar þjóðir, m.a. Íslendinga sem sjá fram á að núverandi stuðningskerfi mun ekki ganga til lengdar.
Evrópusambandið hefur fyrir löngu hafið aðlögunarferli sitt og samþykkti árið 2000 sameiginlega landbúnaðarstefnu ,,Agenda 2000`` þar sem sjónum er beint að byggðaþróun en ekki einungis að framleiðslu eins og áður var og er enn á Íslandi. Í staðinn var samþykkt að styðja við umhverfisvænan landbúnað, styrkja harðbýl svæði, starfsmenntun bænda, skógarhögg og veita fjárfestingar- og þróunarstyrki, m.a. til matvælagerðar eins og áður hefur komið fram í máli mínu.
Það er fróðlegt að lesa umsóknareyðublað um styrki til þróunar og markaðssetningar matvæla hafandi í huga þær ofurkröfur sem íslensk stjórnvöld gera á innlenda framleiðendur og hindra þannig þróun og sjálfstæða markaðssetningu þeirra. Endurskoðuð áætlun var síðan samþykkt í júní 2003 hjá Evrópusambandinu með þeim meginbreytingum að styrkir eru einkum greiddir á býli óháð framleiðslu. Ég spyr því hæstv. landbrh.:
Hvernig hyggst ráðherra haga undirbúningi að aðlögun mjólkuriðnaðarins að væntanlegum kröfum Alþjóðaviðskiptastofnunarinnar, WTO?