[prenta uppsett í dálka] 104. fundur, 130. lþ.
Össur Skarphéðinsson:
Frú forseti. Það ber að fagna sérstaklega frumkvæði hins önfirska frumkvöðuls Ragnars Traustasonar, að hafa ráðist í strandsiglingar milli suðvesturhornsins og Vestfjarða. Ég er þeirrar skoðunar, gagnstætt því sem fram kemur í skýrslu Hagfræðistofnunar sem hæstv. ráðherra vitnaði til, að mikil hagkvæmni sé fólgin í að nýta sjávarleiðir til flutninga. Það snertir ekki bara slys, sem hæstv. ráðherra vísaði til, heldur einnig annars konar markmið sem við verðum að hafa í huga, þ.e. umhverfisvernd.
Við Íslendingar höfum undirgengist alþjóðlegar skuldbindingar sem eiga að knýja okkur til að draga verulega úr losun skaðlegra gróðurhúsalofttegunda. Flutningar á sjó eru klárlega þáttur sem leyst gæti verulegan hluta þess vanda sem við blasir í þeim efnum. Þess vegna segi ég að við eigum að kanna hvort hægt sé, með varfærni, að breyta kerfinu þannig að flutningar verði hagkvæmari á hafi en þeir hafa verið hingað til.
