[prenta uppsett í dálka] 107. fundur, 130. lþ.
Þórunn Sveinbjarnardóttir (andsvar):
Hæstv. forseti. Á þeim forsendum sem ég hef þegar greint frá. Það að koma hingað og sameinast fjölskyldu sinni um lengri eða skemmri tíma hangir þá á því eins og fyrir aðra útlendinga --- segjum sem svo að hingað komi amma, 55 ára, og vilji setjast að, hún þarf að fá starfsleyfi, ekki satt? --- að fá leyfi til að dvelja og starfa á Íslandi?
Það er nefnilega mjög erfitt fyrir útlendinga að setjast að á Íslandi, hæstv. forseti. Það er mjög erfitt að setjast að í landi þar sem fólk fær ekki að koma inn nema hafa fyrst í hendi loforð um starf. Þær reglur setja upp fleiri þröskulda en flestir gera sér grein fyrir, og það er þess vegna sem sameining fjölskyldna sem veitir dvalarleyfi á grundvelli skyldleika og fjölskylduaðstæðna er mannúðleg og það er þess virði að halda í það, hæstv. forseti.
