Guðjón A. Kristjánsson (andsvar):
Frú forseti. Já. Það má eiginlega svara því játandi, að það er hægt að finna því stað að óheppileg samþjöppun sé í fjölmiðlum með sama hætti og ég tel óheppilega samþjöppun á eignarhaldi í sjávarútvegi, þar sem tíu fyrirtæki eiga kvótann og gera hina að leiguliðum. Með sama hætti tel ég að eignasamsetning í bankakerfinu sé orðin óheppileg hér á landi, þar sem tiltölulega fáir aðilar ráða öllu á þeim markaði. Hið sama má segja um olíufélögin og tryggingafélögin, sem var verið að tala um í dag. Það er mjög margt sem hefur farið úrskeiðis í þessu þjóðfélagi á undanförnum árum, hæstv. forseti.