[prenta uppsett í dálka] 110. fundur, 130. lþ.
Steingrímur J. Sigfússon:
Frú forseti. Ég hafði enga hugmynd um hvar hæstv. dómsmrh. væri niður kominn og skiptir mig engu máli. (Gripið fram í: Veit hann það sjálfur?) Þessi dagskrárliður er þannig að ef tilefni eru til að gera athugasemdir um störf þingsins eða eitthvað sem tengist málefnum þingsins hafa þingmenn rétt til þess að gera það í upphafi fundar. Ráðherrar geta ekki komið í veg fyrir að slíkar athugasemdir séu gerðar með því að vera í burtu, hvort sem þeir eru að klífa fjöll eða einhvers staðar annars staðar.
Umboðsmaður Alþingis hefur fellt úrskurð eða öllu heldur gefið út álit þar sem hann beinir tilmælum til Alþingis um aðgerðir í mjög alvarlegu máli og fullgilt að taka það upp hér og ræða undir liðnum Athugasemdir um störf þingsins þó hæstv. dómsmrh. sé ekki viðstaddur. Hitt hefði verið mannborulegra ef hæstv. dómsmrh. hefði haft frumkvæði að því að gera grein fyrir málinu á Alþingi í formi yfirlýsinga t.d.
Hæstiréttur er býsna grátt leikinn af samskiptum við núverandi ríkisstjórn. Hann er rétt að jafna sig eftir hremmingarnar í öryrkjamálunum, bréfaskriftir og annað því um líkt þegar logandi ófriður hefst vegna þess hvernig hæstv. dómsmrh. stendur að málum við skipan hæstaréttardómara. Þar hefur a.m.k. hæstv. dómsmrh. algerlega mistekist að skapa starfsfrið um málefni réttarins. Það er algerlega óhjákvæmilegt að Alþingi taki á málinu. Forsætisnefnd hlýtur að taka tilmæli umboðsmanns Alþingis til skoðunar og í framhaldinu þyrfti að nást niðurstaða í því hvort hún eða sérstök nefnd skoðar málið í framhaldinu. Annað væri vanræksla af hálfu Alþingis. Síðan var það mjög góð spurning sem hæstv. utanrrh. fékk, formaður hins stjórnarflokksins, sem ber fulla ábyrgð á embættisfærslum dómsmrh. eins og allir aðrir sem styðja núverandi ríkisstjórn: Getur hæstv. utanrrh. þegar eða ef að því kemur að hann verður forsrh. haft hinn þríbrotlega ráðherra í ríkisstjórn sinni?
