Þórunn Sveinbjarnardóttir:
Frú forseti. Það er ljóst að áfengisauglýsingabannið heldur ekki á Íslandi og sú auglýsing sem hv. fyrirspyrjandi sýndi hér sýnir það gleggra en nokkuð annað. Það þýðir ekki að rita með tveggja eða þriggja punkta letri í hægra horn niðri 0,0%. Það er verið að auglýsa áfengi, hæstv. forseti, og það hlýtur að vera löggjafans að kveða skýrt upp úr um það hvort það sé leyfilegt að auglýsa áfengi á Íslandi eða ekki. Ef á að leyfa það er hægt að setja um það mjög strangar reglur eins og gert er víða í nágrannalöndum okkar og ef ekki á að leyfa það, sem á víst að vera reglan í dag, þarf að framfylgja því banni, frú forseti, þannig að þeir sem brjóta lögin finni fyrir því í fjársektum og öðru.