Umhverfisráðherra (Siv Friðleifsdóttir):
Hæstv. forseti. Hér er spurt í fyrsta lagi: Hve margar mannaðar veðurathugunarstöðvar eru nú utan höfuðborgarsvæðisins?
Því er til að svara að Veðurstofa Íslands rekur 44 mannaðar veðurskeytastöðvar utan Reykjavíkur. Auk þess rekur Veðurstofan 16 veðurfarsstöðvar og 54 úrkomustöðvar.
Í öðru lagi er spurt: Hvar hafa verið lagðar niður veðurathugunarstöðvar sl. þrjú ár?
Því er til að svara að á síðustu þremur árum, þ.e. 2001--2003, var hætt rekstri á tveimur úrkomustöðvum, tveimur veðurfarsstöðvum og einni skeytastöð, þ.e. fimm stöðvum samtals.
Í þriðja lagi er spurt: Hve mörg störf hafa verið lögð niður á veðurathugunarstöðvum utan höfuðborgarsvæðisins á sama tíma?
Því er til að svara að samtals var starfsemi á þeim stöðvum sem lagðar hafa verið niður skilgreind sem rúmlega eitt ársverk.
Í fjórða lagi er spurt: Er stefnt að frekari fækkun mannaðra veðurathugunarstöðva og þá hvar?
Því er til að svara að auk Hveravalla er gert ráð fyrir að hætta athugunum á Reykhólum í sumar. Reikna má enn fremur með að mönnuðum stöðvum muni fækka á næstu árum vegna tækniþróunar með hliðstæðum hætti og mönnun á vitum hefur verið að leggjast af á síðustu árum. Sams konar þróun hefur átt sér stað erlendis. Það hefur orðið geysileg fjölgun í sjálfvirkum veðurstöðvum á Íslandi hin seinni ár. Veðurstofan rekur nú um 70 slíkar en alls fær Veðurstofan upplýsingar frá 150 sjálfvirkum stöðvum og er það auðvitað mjög mikil breyting frá því sem var og mun örugglega hafa áhrif á mál þannig að mönnuðum stöðvum mun fækka á næstu árum vegna þessarar tækniþróunar.
Í fimmta lagi er spurt: Hvaða veðurupplýsingar tapast við að stöðvarnar eru ómannaðar?
Því er til að svara að á flestum sjálfvirkum stöðvum sem Veðurstofan rekur er mældur vindhraði, þ.e. meðalhraði og hviður, vindátt, hiti, rakastig og loftþrýstingur. Á nokkrum stöðvum er mælt úrkomumagn. Miðað við þá gerð veðurstöðva sem Veðurstofan notar munu falla niður veður-, skýja- og skyggnisupplýsingar auk mælinga á snjódýpt og snjóhulu en á móti kemur að sjálfvirkar stöðvar mæla mun oftar, a.m.k. á klukkutíma fresti allan sólarhringinn.
Í sjötta lagi var spurt: Var lagt mat á öryggishlutverk veðurathugunarstöðvarinnar á Hveravöllum áður en tekin var ákvörðun um lokun hennar?
Því er til að svara að Veðurstofan hefur ekki lagt svokallað öryggismat á einstakar veðurstöðvar, enda er það varla hægt nema þá helst á flugvöllum. Stöðvakerfi Veðurstofunnar vinnur sem heild þótt einstakar stöðvar hafi þar meira vægi en aðrar. Tíðni athugana og gæði þeirra skiptir ekki síður máli en fjöldi stöðva og staðsetning þeirra. Ef hv. fyrirspyrjandi er að spyrja um öryggishlutverk varðandi umferð á hálendinu og mikilvægi þess að hafa fólk uppi á Hveravöllum er því til að svara að Veðurstofan sinnir ekki almennri öryggisgæslu á hálendinu og það fellur alls ekki undir hennar skilgreinda hlutverk.