Ingibjörg Sólrún Gísladóttir (andsvar):
Virðulegur forseti. Ég ætla ekki að setja hæstv. dómsmrh. neinar reglur um það hvernig hann megi tala hér í ræðustól.
En ég bendi bara á hvernig menn eru farnir að tala, hvaða málflutningur hér er uppi. 70% þjóðarinnar telja að þetta frumvarp sé ekki tækt til afgreiðslu hér og eigi að skoðast mun betur. 70% þjóðarinnar er bara orðið Baugslið sem ekkert veit hvað það er að segja og getur ekki haft neina skynsamlega skoðun á málunum.
Svona er málflutningurinn orðinn: ,,Þið sem eruð ekki með okkur, þið sem styðjið ekki fjölmiðlafrumvarpið og eruð á móti okkur, þið eruð bara Baugslið. Þið eruð bara keypt þý.`` Þannig er málflutningurinn hér í þinginu. Þetta er mönnum auðvitað ekki samboðið. Ég hef þá skoðun og ég mun tjá hana hér.
Hvað varðar síðan stjórnarskrárþáttinn og EES-samninginn þá gætum við rætt um það langt mál hér, hæstv. dómsmrh. Ég er sannfærð um það að sá málflutningur sem ég hafði þá uppi var réttur.