Guðjón A. Kristjánsson:
Hæstv. forseti. Óvissan um störfin á hv. Alþingi er mjög óþægileg, vægast sagt. Ég sat í gær fund í allshn. þingsins. Þar var spurt um þetta mál og þá sátt sem menn lýstu yfir, forustumenn flokkanna, og hvort málið kæmi ekki örugglega í allshn. áður en það kæmi til umræðu. Ég held að ég muni það rétt að formaður nefndarinnar hafi sagt eitthvað á þá leið að það væri mjög æskilegt og hann tæki undir þau sjónarmið að æskilegt væri að málið kæmi aftur inn í allshn. áður en það yrði tekið á dagskrá.
Ég hlýt að spyrja hæstv. forseta hvort það eigi að fara að ræða málið án þess að brtt. hafi litið dagsins ljós og án þess að þær hafi verið ræddar í allshn. Mér finnst þetta vinnulag vægast sagt orðið undarlegt, hæstv. forseti.
Þó að forustumenn ríkisstjórnarflokkanna gleðjist í þriðja eða fjórða sinn yfir hinum merku áföngum um sáttargjörð sína þá nær það ekki til okkar þingmanna.