Guðlaugur Þór Þórðarson (andsvar):
Virðulegi forseti. Það er augljóst hver er í nauðvörn í þessu máli. Ræður hv. þingmanns liggja skjalfestar fyrir, (Gripið fram í.) þáltill. þar sem sérstaklega er tekið fram að það þurfi að taka á eignarhaldi á fjölmiðlum hjá markaðsráðandi aðilum, hvorki meira né minna. Það sem hefur síðan gerst er að samþjöppunin hefur orðið miklu meiri, meiri en nokkurs staðar annars staðar gerist. Ef menn hlusta á ræðu hv. þingmanns reynir hann í nauðvörn sinni að tala um það að vinnubrögðin hafi verið með þeim hætti að ekki sé hægt að ná samstöðu. Hv. þm. var ekki að byrja á þingi í gær. Það liggur fyrir að í þessu máli hefur þingflokkur vinstri grænna verið á harðahlaupum undan eigin yfirlýsingum og reynt að passa sig á því að geta staðið fyrir utan þessa ákvarðanatöku. Það liggur alveg hreint og klárt fyrir. Það sem liggur til grundvallar eru þeirra eigin orð fyrir nokkrum mánuðum.