Ögmundur Jónasson:
Hæstv. forseti. Ég tel þetta frv. háskalega vanhugsað og ekki líklegt til að ná yfirlýstum tilgangi um að auka fjölbreytni í fjölmiðlun á Íslandi. Þvert á móti er líklegt að hið gagnstæða verði upp á teningnum og hafa verið færð fyrir því ítarleg rök við umræðu á Alþingi um málið.
Afgreiðsla þessa þingmáls veitir þjóðinni hins vegar dýrmæta innsýn í sálarlíf ríkisstjórnarinnar, í vinnubrögð formanna stjórnarflokkanna, fylgispekt stjórnarþingmanna við formenn sína en ekki verður sagt að þar séu á ferðinni öflugir liðsmenn lýðræðislegra og vandaðra vinnubragða.
Ég vona að þjóðin láti þessa reynslu ekki falla í gleymskunnar dá. Ég segi nei.