Frsm. menntmn. (Dagný Jónsdóttir) (andsvar):
Herra forseti. Ég þakka hlý orð í þessari umræðu. Það var kannski ótrúlegt hvernig réttarstaða íslenskrar tungu tengist rjúpunni en ég ætla ekki að fara nánar út í þau mál.
Vegna orða hv. þm. Sigurjóns Þórðarsonar um viðurkenningu táknmáls vísa ég í nefndarálitið sem við erum að fjalla um. Þar segir, með leyfi forseta:
,,Þá skipta óskir heyrnarlausra, heyrnarskertra og daufblindra um viðurkenningu á íslenska táknmálinu sem móðurmáli sínu einnig verulegu máli í þessum efnum þar sem ljóst þarf að vera hver réttarstaða íslenskunnar er svo að komið geti til álita að gera íslenska táknmálið jafnrétthátt íslensku.``