[prenta uppsett í dálka] 129. fundur, 130. lþ.
Forsætisráðherra (Davíð Oddsson) (andsvar):
Virðulegi forseti. Atkvæðaskýring mín sneri ekki að neinu leyti að synjunarvaldi forseta Íslands. Í atkvæðaskýringu minni vitnaði ég í orð þáverandi hv. alþingismanns, Ólafs Ragnars Grímssonar, sem taldi afar þýðingarmikið af efnislegum ástæðum að setja lög sem hindruðu samþjöppun fjölmiðla. Ég minntist ekki einu orði í atkvæðaskýringu minni á synjunarvald eða slíka hluti.
Ég vitnaði í þennan fyrrverandi forustumann, þáverandi forustumann hv. þingmanns ef ég man rétt. Ég held að þeir hafi verið þá í sama flokki og sennilega hafa þeir verið sömu skoðunar en ég man ekki hvort þeir voru sprungnir þá þegar milli sín. Ég vitnaði í það efni og ég býst við því að hv. þingmaður hafi verið sama sinnis.
Nú fær hann reyndar ráð frá samþingmanni sínum, við skulum sjá hvað hann segir.
