Guðjón A. Kristjánsson (andsvar):
Hæstv. forseti. Ég þakka hv. framsögumanni fyrir yfirferðina. Það er aðeins eitt sem ég vildi fá nánari skýringar á. Í nál. segir, með leyfi forseta:
,,Þá telur meiri hlutinn eðlilegt að við mótun skipulags Landbúnaðarháskóla Íslands verði starfseminni deildaskipt.``
Ég hefði viljað vita hvað þarna væri nákvæmlega átt við. Er átt við t.d. það sem segir í brtt. varðandi 21. gr. laganna?
,,Landbúnaðarháskóli Íslands er vísindaleg fræðslu- og rannsóknastofnun á háskólastigi á sviði landbúnaðar og garðyrkju sem veitir nemendum sínum fræðslu og vísindalega þjálfun er miðast við að þeir geti tekið að sér sérfræði- og rannsóknastörf í þágu íslensks landbúnaðar og garðyrkju.`` --- Er það þessi deildaskipting sem verið er að víkja að í þessari setningu eða hvaða hugmyndir eru á bak við deildaskiptinguna sem hér er vikið að í einni setningu?