Pétur H. Blöndal (andsvar):
Herra forseti. Hv. þm. kveinkar sér undan ummælum í meirihlutaáliti um stjórnarandstöðuna. Mér finnst það dálítið undarlegt og ég spyr hann hvort samræmi sé í því að nánast öll byrjunin eða fyrstu tvær síðurnar í nál. minni hlutans fjalla um ríkisstjórnina og stjórnarmeirihlutann o.s.frv., talað um 100 daga stríð og brellur ríkisstjórnarinnar og atlögu að 26. gr. Er samræmi í þeim málflutningi? Svo er örstutt í nál. meiri hlutans um minni hlutann.
Hv. þm. talaði mjög gáfulega um að sagan gerist í stökkum og ég er sammála því --- og það varð jarðskjálfti 2. júní. Ég ætla að spyrja hv. þm. hvort hann telji að ákvæði 26. gr. sem ekki var notað í 60 ár verði nú virkara, og hvort hv. þm. telji að forseti lýðveldisins hafi aukið völd sín með því að skrifa ekki undir og hvort embættið sé orðið pólitískt og í næstu kosningum verði það stjórnmálaflokkar sem bjóði fram.