Ögmundur Jónasson (andsvar):
Herra forseti. Ég held að það sé alveg augljóst að tækniþróunarsjóði er ekki ætlað að fjármagna grunnrannsóknir samkvæmt þeim skilningi sem hefðbundið er að leggja í það hugtak.
En ég minnist þess að þegar nýskipan í fjármögnun vísindarannsókna var rædd hér á vorþingi, þá voru höfð frammi mikil fyrirheit og loforð og upphrópanir um stóraukið fé til rannsókna, þar á meðal til grunnrannsókna. Nú erum við að þrátta um það hvort dregið sé saman eða haldið í horfinu. Þetta eru öll stóru loforðin. Nú er illa komið, hæstv. fjmrh.