Frsm. meiri hluta landbn. (Drífa Hjartardóttir) (andsvar):
Hæstv. forseti. Að sjálfsögðu er umræðan mjög mikilvæg. En ég vil bara taka það fram vegna þess að nafn mitt var nefnt hér að þannig vill nú til að tveir stjórnarliðar í hv. landbn. eru staddir erlendis í störfum fyrir þingið. Þess vegna eru þeir ekki við umræðuna í dag. Mér finnst bara ómerkilegt að segja að stjórnarliðar nenni ekki að taka þátt í umræðunni.
En varðandi það sem var rætt áðan um hagsmuni veiðiréttarhafa í þessari grein þá eru þeir æðimiklir og það miklir hagsmunir felast í því að rétt sé á málum haldið. Ég tel að með þessari efnismeðferð frv. hafi það verið tryggt.