[prenta uppsett í dálka] 27. fundur, 130. lþ.
Guðjón A. Kristjánsson (andsvar):
Virðulegi forseti. Ég kom að því í ræðu minni hver kostnaðurinn mundi verða við að sækja um aðild að öryggisráðinu. Ég vonast til að síðar í dag geti utanrrh. gert okkur grein fyrir því á hv. Alþingi hvaða kostnaður hann telur að muni fylgja þeirri upphefð sem verið er að sækjast eftir. Ég held að það sé nauðsynlegt að fá það upplýst.
Mér sýnist margt í ræðu utanrrh. benda til að til ákveðinna verka hafi verið stofnað beinlínis í þeim tilgangi að efla stöðu okkar til að ná sæti í öryggisráðinu. Mér finnst nauðsynlegt að það sé upplýst af hæstv. ráðherra til hvaða kostnaðar er stofnað beinlínis í þeim tilgangi.
