Ásta R. Jóhannesdóttir:
Herra forseti. Ég beini fyrirspurn til hæstv. félmrh. vegna rangra eða misvísandi ummæla sem hann viðhafði á Alþingi þegar við ræddum starfslokasamninga tveggja ríkisstofnana. Hæstv. ráðherra furðaði sig á því að hann skyldi kallaður til og spurði eitthvað í þá veru hvaða tilgangi það þjónaði að koma með inn í þingsal málefni einstaklings úti í bæ sem hefði látið af störfum fyrir ríkið í sátt og samlyndi við félmrn. og það hefði verið gert upp við þann einstakling.
Nú hefur það komið fram ítrekað í fjölmiðlum að það var ekki í sátt og samlyndi sem þessi einstaklingur lét af störfum fyrir ríkið og það var ekki búið að gera upp við þennan einstakling eins og hæstv. ráðherra kallaði hana hér í umræðunni. Ég spyr: Var um einhvern misskilning að ræða þegar ráðherrann gaf þessar röngu upplýsingar í þinginu? Ráðherranum hlýtur að vera ljóst að það er mjög alvarlegt ef ráðherra gefur þinginu rangar upplýsingar vísvitandi, og því spyr ég: Vissi hæstv. ráðherra ekki betur?