Jón Bjarnason:
Herra forseti. Ég vil láta í ljós þá skoðun mína að störf presta og skipan prestakalla í landinu eru og hafa verið um aldir ákveðnir hornsteinar í uppbyggingu á okkar þjóðskipulagi og okkar samfélagslegu þjónustu sem hefur einmitt byggst upp í kringum skipan prestakalla. Hlutverk presta og hvernig kirkjan fer með þjónustu sína skiptir okkur þess vegna öll máli.
Ég tel t.d. að í stöðu Bíldudalsprestakalls þar sem meginþorri íbúanna hafði skorað á biskup og kirkjustjórn Íslands að þangað kæmi prestur til starfa, hefði átt að ráða nokkru um viðbrögð kirkjunnar í þeim efnum, og ráða prest en ekki láta prestakallið standa tómt.
Virðulegi forseti. Ég legg áherslu á að skyldur þjóðkirkjunnar í þessu máli eru miklar og verður að vera hægt að gera til hennar þjóðfélagslegar kröfur.