Einar Oddur Kristjánsson (andsvar):
Virðulegi forseti. Það hefur nú komið í ljós að hv. þm. getur mjög vel lært og því skora ég á hann að læra almannatryggingalögin. Þar stendur, hæstv. forseti, að kjör þeirra skuli fylgja almennri þróun verðlags eða almennri þróun launa. Þetta eru lögin í landinu, hafa verið það síðan 1996 og þeim hefur verið fylgt nákvæmlega. Það hefur margsinnis komið til ágreinings um þau, það hefur margsinnis verið sýnt fram á að svo hefur verið gert. Það er hins vegar rangt að það sé verið að fylgja launavísitölu. Munurinn á þessu er launaskrið sem er mjög óheppilegt að sé inni í þessum bótum og allir sammála því að launaskrið getur virkað bæði aftur á bak og áfram. Þetta ættu menn að geta séð. Það stendur í lögunum en það eru lögin sem gilda í þessu efni.