Heilbrigðisráðherra (Jón Kristjánsson) (andsvar):
Herra forseti. Mér er ljúft að svara þingmanni þjóðarinnar um framkvæmdir í kjördæmi hans. Ég get ekki fallist á að brotið hafi verið á kjördæmi hv. þingmanns. Fyrir dyrum stendur að opna hjúkrunarheimili á Vífilsstöðum sem eru í kjördæmi hans. Til stendur að opna heilsugæslustöð í janúar í kjördæmi hv. þingmanns, í Salahverfi í Kópavogi. Þar á eftir verður heilsugæslustöð í Voga- og Heimahverfi, og við höfum fengið heimild og munum auglýsa eftir húsnæði fyrir heilsugæslustöð í Hafnarfirði. Við erum að skoða með hvaða hætti sú heilsugæslustöð verður rekin. Það kemur t.d. til greina að semja við sjálfstætt starfandi heilsugæslulækna um rekstur í Hafnarfirði. (Forseti hringir.) En ég verð að geyma til síðari ræðu minnar nánari umræðu um heilsugæsluna.