[prenta uppsett í dálka] 41. fundur, 130. lþ.
Fyrirspyrjandi (Guðjón Ólafur Jónsson):
Hæstv. forseti. Ég þakka hæstv. umhvrh. fyrir svörin. Það liggur fyrir að í tillögum Umhverfisstofnunar er gert ráð fyrir því að 75 svæði verði vernduð til lengri tíma. Í þeim drögum sem umhvrn. hefur unnið að í náttúruverndaráætlun er gert ráð fyrir að 14 svæði verði á náttúruverndaráætlun, auk Vatnajökuls, ef ég hef skilið það rétt. Ég vil ítreka þakkir mínar til hæstv. ráðherra fyrir þessa vinnu. Þarna hefur greinilega mikil vinna farið fram og hæstv. ráðherra á heiður skilinn fyrir þann þátt.
Það kom fram hér í máli hæstv. umhvrh. að till. til þál. um náttúruverndaráætlun 2004--2008 yrði lögð fram á hinu háa Alþingi fljótlega. Ég fagna því og tel nauðsynlegt að hv. alþingismenn fái tækifæri til að ræða náttúruvernd og náttúruverndaráætlun. Í gamla daga var náttúruminjaskrá og náttúruvernd meira og minna til umræðu annars staðar en á hinu háa Alþingi.
Að lokum ítreka ég þakkir mínar til hæstv. ráðherra fyrir svörin og það góða starf sem hún hefur unnið í þessum málum.
