[prenta uppsett í dálka] 42. fundur, 130. lþ.
Frsm. 2. minni hluta fjárln. (Jón Bjarnason) (andsvar):
Ég fagna því að þetta fari til þinglegrar meðferðar í samgn., að þetta sé bara tillaga sem lögð er hérna fram og fagna því reyndar líka að hæstv. ráðherra skuli bera hana fram inn í þingið.
Hins vegar verð ég að láta í ljós mikil vonbrigði með að landshlutar eins og Vestfirðir og norðausturhornið, sem lögð var sérstök áhersla á í vor að fengju auknar fjárveitingar og að þar yrði aukið átak í vegamálum, skuli einmitt núna lenda undir hnífnum og þar skuli skorið niður. Það er í fullkomnu ósamræmi við þær áherslur sem lagðar voru upp í vor.
Einnig vil ég benda á að sumir vegir, safnvegir eða tengivegir sem þarna er um að ræða, fá kannski allt fjármagnið sem varið er til þessara vegaflokka á stórum landsvæðum. Ég nefni Vatnsdalsveg. Ég nefni Drangsnesveg. Mér finnst því að huga þurfi vel að því hvernig þetta kemur niður bæði hvað varðar væntingar fólks og einnig verklegar framkvæmdir.
