[prenta uppsett í dálka] 42. fundur, 130. lþ.
Frsm. 1. minni hluta fjárln. (Einar Már Sigurðarson) (andsvar):
Herra forseti. Við skulum halda aðeins áfram með þetta ágæta mál. Í skýrslu Ríkisendurskoðunar segir, og það verður fróðlegt að fá viðhorf hv. þingmanns gagnvart því í framhaldi af þessum skorti á stefnu til framtíðar, með leyfi forseta:
,,Ráðuneyti heilbrigðismála, fjármálaráðuneytið og faghópar innan sjúkrahússins hafa mismunandi skoðanir á stefnumótun sjúkrahússins. Þessir aðilar þurfa að ná samstöðu um það hvaða áherslu skuli leggja á sparnað í rekstri, skilvirkni og magni þeirrar þjónustu sem veita á og þátt rannsókna og kennslu í starfseminni.``
Hér er nær öll starfsemi sjúkrahússins komin sem þarf að ná samstöðu um.
Hvernig stendur á því, hv. þingmaður, að þau stjórnvöld sem þú hefur stutt um æðilangt skeið hafa ekki sinnt þeirri sjálfsögðu skyldu sinni að sýna frumkvæði í því að stefna verði mótuð á þessu stóra sjúkrahúsi sem er auðvitað sá einstaki fjárlagaliður sem tekur líklega hvað mest á fjárlögum hvers árs?
