[prenta uppsett í dálka] 44. fundur, 130. lþ.
Guðjón Ólafur Jónsson (andsvar):
Hæstv. forseti. Ekki voru svörin betri hjá hv. þm. en í ræðu hans. Fyrir liggur að bætur og óskertar mánaðargreiðslur til örorkulífeyrisþega hafa á næsta ári, miðað við þær breytingar sem lagðar eru til í þessu frv., hækkað um 135% frá árinu 1995. Það er sama hvernig hv. þm. Ásta Ragnheiður Jóhannesdóttir reynir að hjálpa þingmanninum að skilja þetta, það virðist ekki ganga.
Hvenær hafa öryrkjar haft það betra á Íslandi en akkúrat um þessar mundir? Aldrei. Og það er fyrir utan það hvað kaupmáttur örorkubóta hefur vaxið á þessu tímabili. Það er óhrekjanleg staðreynd að kaupmáttur örorkubóta og hagur öryrkja hefur aldrei verið betri en einmitt á starfstímabili núverandi ríkisstjórnar frá 1995. Það eiga menn að muna og menn eiga að viðurkenna það, hæstv. forseti.
