Frsm. minni hluta heilbr.- og trn. (Ágúst Ólafur Ágústsson) (andsvar):
Herra forseti. Eins og hv. þm. Jónína Bjartmarz kom inn á eru þessar tölur byggðar á upplýsingum frá embættismönnum ráðuneytisins sem voru kallaðir fyrir heilbr.- og trn. Það sem við erum í rauninni að hnykkja á í minnihlutaáliti heilbr.- og trn. er að við þurfum að huga að þessum sérstaka hópi, 16--17 ára öryrkjum. Reyndar veit ég að það er skilningur innan heilbr.- og trn. fyrir því að vera á varðbergi gagnvart þessum hópi en við teljum afskaplega mikilvægt að bregðast við því. Það eru ákveðnar brotalamir á löggjöfinni eftir að lögræðislögunum var breytt. Það eru þessi millibilsár sem um er að ræða og við þurfum að hafa það í huga í allri lagasetningu og sérstaklega þegar við erum að tala um breytingar á almannatryggingalöggjöfinni hvernig sú lagabreyting muni snerta viðkomandi aldursflokk.