Virðulegi forseti. Vissulega er rétt að þetta mun taka skuldaklafann af íslenskum útgerðum, en það er ljóst að það mun setja skuldirnar yfir á einhvern annan. Það er þá væntanlega sá sem á kröfurnar í dag. Í frumvarpinu er sérstaklega tekið fram að kröfur á hendur kvótaskuldasjóði muni ekki bera vexti í framtíðinni. Mér er því spurn: Hver á að fjármagna þetta, eða á að setja bankakerfið á hausinn við þetta? Á ríkið að borga inn í bankana eða hvernig er þetta hugsað, eða er þetta kannski ekki hugsað?