Hæstv. forseti. Á undanförnum hálfum mánuði hef ég tekið við undirskriftum úr Fjarðabyggð þar sem hvatt er til þess að Norðfjarðargöngum verði flýtt. Ég hef tekið við undirskriftum á Vestfjörðum þar sem hvatt er til að gerð Dýrafjarðarganga verði hraðað og þau reyndar sett fram fyrir Norðfjarðargöng, gagnstætt því sem tillögur samgönguáætlunar kveða á um. Mér væri það mikið gleðiefni ef okkur tækist að flýta þessum framkvæmdum. Sjálfum finnst mér ekki koma til greina, ef kostur er á því að ráðast í gerð þessara ganga fyrr en áður hefur verið ráðgert, að seinka því. Mér fyndist það mikið gleðiefni. Ég veit að þar tala ég fyrir munn okkar allra hér í þingsal að við viljum sjá þessar samgöngubætur (Forseti hringir.) á Austurlandi og einnig á Vestfjörðum.