Breyting á XVIII. viðauka við EES-samninginn.
Frsm. utanrmn. (Sólveig Pétursdóttir) (S):
Hæstv. forseti. Ég mæli fyrir nefndaráliti utanríkismálanefndar á þskj. 1196, máli 435, tillögu til þingsályktunar um staðfestingu ákvörðunar sameiginlegu EES-nefndarinnar nr. 45/2004, um breytingu á XVIII. viðauka (Öryggi og hollustuhættir á vinnustöðum, vinnuréttur og jafnrétti kynjanna) við EES-samninginn.
Með tillögunni er leitað heimildar Alþingis til að staðfesta ákvörðun sameiginlegu EES-nefndarinnar nr. 45/2004 frá 23. apríl 2004, um breytingu á XVIII. viðauka við EES-samninginn frá 2. maí 1992, og til að fella inn í samninginn tilskipun Evrópuþingsins og ráðsins 2003/88/EB frá 4. nóvember 2003 um ákveðna þætti er varða skipulag vinnutíma
Nefndin fékk til fundar við sig þau Ernu S. Hallgrímsdóttur frá utanríkisráðuneyti, Gylfa Kristinsson frá félagsmálaráðuneyti, Bjarna Þór Eyvindsson frá Samtökum unglækna, Gunnar Björnsson frá fjármálaráðuneyti, Guðríði Þorsteinsdóttur frá heilbrigðis- og tryggingamálaráðuneyti og Ragnar Árnason frá Samtökum atvinnulífsins.
Vinnutímatilskipunin felur í sér lágmarksreglur um skipulag vinnutíma að teknu tilliti til öryggis og heilbrigðis starfsmanna. Tilskipunin gildir um daglegan og vikulegan lágmarkshvíldartíma, árlegt orlof, um hlé og hámarksvinnutíma á viku og tiltekna þætti í tengslum við næturvinnu, vaktavinnu og vinnumynstur. Vinnutímatilskipunin hefur verið innleidd í íslenskan rétt að því er flestar starfsgreinar varðar. Efni vinnutímatilskipunar mun nú taka til allra atvinnugreina ef sérreglur hafa ekki verið settar um þær, svo sem um farmenn.
Innleiðing tilskipunar þessarar kallar á lagabreytingar hér á landi en að meginstefnu til hefur það verið gert nú þegar með breytingu á lögum um aðbúnað, hollustuhætti og öryggi á vinnustöðum, nr. 46/1980, með síðari breytingum, og lögum um orlof, nr. 30/1987, með síðari breytingum. Þá er einnig mögulegt að innleiða efni hennar með kjarasamningum aðila vinnumarkaðarins.
Við meðferð málsins í nefndinni var einkum rætt um lækna í starfsnámi. Ákvæði vinnutímatilskipunarinnar hefur enn sem komið er ekki verið innleitt hvað lækna í starfsnámi varðar en með samþykkt þessarar tilskipunar er ljóst að grípa verður skjótt til aðgerða. Ljóst er að vinnutími unglækna er oft og tíðum mjög langur sem hlýtur að koma niður á bæði læknum og sjúklingum.
Hins vegar þarf líka að sjá til þess að þeir fái næga starfsþjálfun.
Af þeim sökum telur nefndin brýnt að löggjafinn, stjórnvöld og aðilar vinnumarkaðarins bregðist við og geri nauðsynlegar breytingar sem fyrst en tilskipunin virðist veita nokkurt svigrúm hvað nokkrar stéttir varðar, þar á meðal heilbrigðisstarfsmenn.
Hæstv. forseti. Utanríkismálanefnd leggur til að tillagan verði samþykkt og undir nefndarálit þetta skrifa hv. þm. Sólveig Pétursdóttir, Guðmundur Árni Stefánsson, Dagný Jónsdóttir, Drífa Hjartardóttir, Rannveig Guðmundsdóttir, Einar K. Guðfinnsson, Jónína Bjartmarz, Þórunn Sveinbjarnardóttir og Ögmundur Jónasson, en sá síðastnefndi ritar undir nefndarálitið með fyrirvara.
