Framkvæmd samkeppnisreglna EES-samningsins.
Ögmundur Jónasson (Vg):
Hæstv. forseti. Ég vil leggja áherslu á þá afstöðu þingflokks Vinstri hreyfingarinnar – græns framboðs að við vörum við því og mótmælum því að dómsvald sé framselt út fyrir landsteinana eins og hér er verið að gera. Í besta falli er um að ræða álitamál eða óvissu eins og fram kom í máli hv. formanns utanríkismálanefndar.
Ég leyfi mér að vísa í röksemdir sem fram hafa komið hvað þetta snertir frá fulltrúum þingflokks Vinstri hreyfingarinnar – græns framboðs í umræðu um samkeppnislög, í álit laganefndar Lögmannafélags Íslands og í álitsgerð frá Stefáni Má Stefánssyni, prófessor í lögum, en þar er að finna mjög eindregin varnaðarorð gegn því lagaákvæði og þeim þingmálum sem hér hafa verið til umræðu.