tekjuskattur.
Frú forseti. Hv. þm. Jón Magnússon gerði tekjuskatt að umtalsefni og taldi að ég hefði orðað það þannig að 150 þús. markið væri of lágt. Ég orðaði það reyndar þannig að ég teldi það ekki hrökkva til að bæta upp skerðingar sem hafa orðið á persónuafslætti, barnabótum og vaxtabótum, svo ég haldi því til haga.
Tekjuskattur er mjög merkilegur skattur. Hann var fundinn upp á sínum tíma og skyldi lagður á eftir efnum og ástæðum. Hann hefur snúist upp í andhverfu sína að þessu leyti.
Þegar ég man fyrst eftir mér í skattamálum þá gáfu skattstjórar út langar bækur með töflum þar sem menn gátu sett á árstekjur sínar og fengið út skattinn. Hann var þrepaður og margfalt þrepaður og þurfti töluvert langar bækur. Í dag er sagt að óframkvæmanlegt sé að þrepa skattinn í okkar tæknivædda nútímaþjóðfélagi. Það er náttúrlega mesta firra. Það er auðvitað framkvæmanlegt.
Ég vil líka halda því til haga, hv. þingmaður, koma því að að fram er kominn hópur manna sem ég kalla gæluskattgreiðendur Sjálfstæðisflokksins, sem greiða aðeins 10% skatt, fjármagnstekjuskatt af tekjum sínum þótt þeir séu í fullu starfi við að afla þeirra tekna og hafi engar aðrar tekjur. Maður spyr sig: Hvar er jafnræðisregla stjórnarskrárinnar? Er hún fallin fyrir borð? Hvað varð um hana? Af hverju eru þessar gælur gerðar við þá 2.500 Íslendinga meðan staða láglaunafólks, öryrkja, aldraðra er með þeim hætti sem raun ber vitni?