störf þingsins.
Virðulegur forseti. Ég trúi því ekki sem ég var að heyra. Ég trúi því ekki að hv. þm. Ásta Möller, formaður heilbrigðisnefndar Alþingis, ætli virkilega að moka þessu máli í gegn á örfáum dögum. Þetta eru 73 greinar og 4 bráðabirgðaákvæði. Í fyrstu setningunni varðandi efni málsins, umsögn um frumvarp til laga um sjúkratryggingar, þá stendur hér, með leyfi virðulegs forseta:
„Með frumvarpinu er lagt til að sett verði ný heildarlög um sjúkratryggingar og sjúklingatryggingar.“
Þarna er verið að fara inn á einkarekstrarbrautina í auknum mæli, talað um útboð o.s.frv., fullt af málum sem þarf að skoða miklu betur. Það er ekki boðlegt að stunda ekki fagleg vinnubrögð á Alþingi. Það er liðin tíð. Það þýðir ekki að koma hér upp og ætla að moka þessu máli í gegn á örfáum dögum. Það gengur ekki upp, virðulegi forseti. Það er niðurlæging fyrir þingið ef klára á þetta mál á þetta fáum dögum. Hvernig á að fá umsagnir um svona stórt mál á svona fáum dögum, virðulegi forseti?
Ég vil líka spyrja virðulegan forseta: Forsetaembættið hefur mikil áhrif á það hvernig unnið er í þinginu. Starfandi hæstv. forseti er ágætlega að sér um heilbrigðismál þannig að ég vil gjarnan fá að heyra í starfandi hæstv. forseta þingsins hvort það er virkilega þannig að við getum ekki fengið svör um hvort þetta mál verður rætt á morgun og hvort á að klára það áður en þingi lýkur, á þessum örfáu dögum. Ég trúi ekki að það eigi að niðurlægja þingið. Ég mótmæli því, virðulegi forseti.