ríkisábyrgð á lántöku Tryggingarsjóðs innstæðueigenda og fjárfesta.
Virðulegi forseti. Hv. þm. Pétur H. Blöndal spyr hvort ég telji að ríkisábyrgðin frá 28. ágúst sé fallin úr gildi. Ég vona að ég detti ekki í einhvern lagalegan pytt því að ég er ekki mjög góð í lögfræði. Hins vegar vil ég segja að við erum í samningum við aðrar þjóðir. Ríkisábyrgðin, eins og við samþykktum hana í vor, var einhliða yfirlýsing um það hvernig við vildum að gengið yrði frá samningum. Það var ekki á það fallist. Það er mjög einfalt mál og það þarf ekki að tala um það í margar vikur. Hér er komin lausn þar sem helstu atriði sem skipta máli eru í þessu frumvarpi. Ég mælist til þess að þingheimur samþykki þetta frumvarp til að við komum því í verk sem þarf að gera til að endurreisa efnahagslífið sem sett var á hvolf. Ég segi það alveg eins og er að ef ég bæri ábyrgð á því ætti ég erfitt með að vakna á morgnana, hv. þm. Pétur H. Blöndal.
Ég ætla líka að segja út af óvissunni, að ég las það í ekki ómerkara blaði en Fréttablaðinu í morgun (Gripið fram í.) að lánshæfismat vegur salt núna vegna þess að við höfum ekki samið. Á fundum sem ég var á í gær og í morgun var sífellt talað um óvissuna vegna þess að ekki hefur enn verið gengið frá Icesave-samningunum. Og þetta eru ekki óvinir Péturs H. Blöndals á þessum fundum. Þetta eru Samtök atvinnulífsins (Gripið fram í.) og fyrirtækjarekendur í landinu sem hafa þetta að segja. (Gripið fram í: Ekki almenningur. …)