samningur milli Íslands og Færeyja um fiskveiðar innan íslenskrar og færeyskrar lögsögu árið 2022.
Virðulegi forseti. Ég þakka hæstv. ráðherra fyrir þetta og hið hefðbundna samtal við þingið þegar kemur að Færeyingum. Mig langaði að forvitnast hjá hæstv. ráðherra hvort fyrirhugaðar séu einhverjar breytingar á fyrirkomulaginu í samskiptum við Færeyinga. Hvort það sé eitthvað í farvatninu, að við séum að ná saman um önnur mál sem við höfum ekki náð saman um hingað til, eins og til að mynda í síldinni og að mig minnir kolmunnanum. Eru einhverjar breytingar sem myndu hafa áhrif á þennan samning okkar við Færeyinga? Ég geri mér grein fyrir því að hæstv. ráðherra er ekki búinn að vera lengi í ráðuneytinu. Ég sætti mig alveg við að ráðherra fari yfir málið á handahlaupum. Mig langar einfaldlega að forvitnast um hvort það sé eitthvað í pípunum um að samskipti við Færeyinga, sem eru gríðarlega mikilvæg fyrir okkur — það skiptir okkur máli að vera í góðum samskiptum við þessa miklu og mikilvægu grannþjóð okkar, systurþjóð, en engu að síður eru þarna líka harðkjarnahagsmunir þeirra og okkar í húfi. Megum við vænta einhverra breytinga á fyrirkomulaginu í samningum við Færeyinga?