stefnuræða forsætisráðherra og umræður um hana.

Hæstv. forseti. Kæru landsmenn. Evrópa og heimurinn allur stendur frammi fyrir erfiðum áskorunum. Nú geisar skelfilegt stríð, orkukreppa blasir við Evrópu og fólk kvíðir vetri. Við Íslendingar stöndum vissulega frammi fyrir mörgum áskorunum en við megum ekki gleyma því að við búum við ákjósanlegri lífsskilyrði en margir aðrir. Á Íslandi er orkan okkar græn og umhverfisvæn. Hér er friðsælt, lífskjör eru almennt góð og jöfnuður er óvíða meiri. Já, það er stundum hollt að við minnum okkur á hversu lánsöm við raunverulega erum. Verkefnin eru þó ærin, m.a. á sviði heilbrigðismála. Með vaxandi lífaldri og auknum kröfum okkar um meiri lífsgæði verða viðfangsefnin æ fleiri og meira krefjandi. Við verjum um þriðjungi af heildarfjárhæð fjárlaga til heilbrigðismála. Því skiptir máli hvernig við verjum þeim fjármunum. Notandinn er í forgrunni þeirrar ákvörðunartöku. Þjóðin er að eldast. Tækniframförum fleygir fram og sjúkdómur sem var ólæknandi fyrir nokkrum árum er í dag er læknanlegur. En heilbrigðiskerfið snýst ekki aðeins um öfluga heilbrigðisþjónustu heldur það að gera fólki betur kleift að huga að eigin heilsu.

Kæru landsmenn. Heilsan er okkar dýrmætasta eign. Það eru sameiginlegir hagsmunir þjóðarinnar að aukin áhersla sé lögð á lýðheilsu, forvarnir og geðheilbrigðismál. Aukin áhersla á lýðheilsu mun bæði endurspeglast í aðgerðaáætlun í lýðheilsumálum og árlegu heilbrigðisþingi sem verður helgað lýðheilsu. Alþingi ályktaði nú í vor um stefnu í geðheilbrigðismálum til ársins 2030. Markviss áætlun á grunni stefnunnar um aðgerðir í geðheilbrigðismálum er í mótun og mun koma fyrir þingið sem þingsályktunartillaga í byrjun næsta árs. Mönnun í heilbrigðisþjónustu er gríðarleg áskorun hér á landi, á heimsvísu, nú og til framtíðar. Heilbrigðisstarfsfólk þarf í kjölfar heimsfaraldurs endurheimt og stuðning. Þegar samfélagið fer á fulla ferð og ferðamenn sækja okkur heim verða verkefnin krefjandi sem aldrei fyrr. Það er okkar stjórnvalda að tryggja að umgjörðin sé í lagi, nýr spítali, nýsköpun, tækni, lyf, menntun, vísindi, húsnæði — já, listinn er langur — innviðir, samningar um þjónustu, allt sem tryggir bættan aðbúnað og kjör fyrir mannauðinn, þjónustuveitendur og þiggjendur.

Kæru landsmenn. Það er fátt verðmætara en að aðstoða einstaklinga við að ná upp tapaðri færni til að geta haldið sjálfstæði sínu, lífsgæðum og virkni í samfélaginu. Nýverið skipuðum við ráðherrar heilbrigðismála og félagsmála sameiginlegt endurhæfingarráð sem hefur það hlutverk að vera okkur til ráðgjafar um faglega stefnumörkun og skipulag þjónustu á sviði endurhæfingar. Einnig er það sameiginlegt verkefni þvert á ráðuneyti okkar, félags- og vinnumarkaðsráðherra, fjármálaráðherra og sveitarfélaganna að vinna að umbótum í málefnum aldraðra og þar hefur verið sett á fót sérstök verkefnastjórn til að leiða það verkefni.

Kæru landsmenn. Heilbrigðisþjónusta getur ekki verið háð hagsveiflum. Í nýframlögðu fjárlagafrumvarpi eru framlög til heilbrigðismála aukin og það er engin aðhaldskrafa sett á heilbrigðisstofnanir, sjúkrahús og öldrunarstofnanir. Í því felast skýr skilaboð: Ríkisstjórn Katrínar Jakobsdóttur stendur vörð um heilbrigðiskerfið. Sameinumst um stöðugar umbætur heilbrigðiskerfisins. Öflugt samfélag byggir ekki síst á sterku heilbrigðiskerfi.