fjárlög 2023.
Virðulegur forseti. Ég þakka hv. þingmanni fyrir fyrirspurnina. Það hefur verið minn skilningur eftir að hafa verið að rýna þetta fjárlagafrumvarp sem við ræðum hér, að stóra línan, stóra markmiðið í því sé einmitt að ná niður verðbólgunni, það sé sameiginlegt verkefni okkar allra. Það er stóra verkefnið í þessu. Þær aðgerðir sem farið er í í þessu frumvarpi miða flestar að því að reyna að ná verðbólgunni niður vegna þess, eins og ég kom inn á í minni ræðu, að það er stóra verkefnið okkar. Það er hagsældarverkefni að ná þessari verðbólgu niður og tryggja að hún festist ekki hér í sessi, sem yrði skelfilegt fyrir íslensk heimili og íslensk fyrirtæki.
Fordæmi gagnvart sveitarfélögunum. Ég á erfitt með að átta mig á því hvað það er, hvað þetta mun þýða fyrir sveitarfélögin. Ég held að það sé bara mjög misjafnt eftir sveitarfélögum. Þau eru í mjög misjafnri stöðu. Þau eru mjög misjöfn. Á meðan ég sat og velti fyrir mér þessari fyrirspurn hv. þingmanns þá var niðurstaðan eiginlega sú að ég átta mig ekki á því hvað þetta mun þýða fyrir sveitarfélögin. Eflaust mun þetta þýða eitthvað fyrir einhver þeirra. Ég get ekki svarað betur en þetta, ég átta mig ekki á því.