þjóðaratkvæðagreiðsla um framhald viðræðna við Evrópusambandið.
Virðulegur forseti. Ég þakka aftur hv. þingmanni fyrir andsvarið. Hann segist hafa nefnt byggingariðnaðinn bara sem dæmi, það sé almennt mikil sveifla. Jú, það eru vissulega sveiflur í íslensku atvinnulífi en byggingariðnaðurinn er dæmi um iðnað á Íslandi sem fer í ótrúlega miklar sveiflur og mun meiri sveiflur en aðrar atvinnugreinar. (LE: Vextir og gengi.) Það getur vel verið að vextir hafi þar áhrif, en það er eitthvað annað líka, hv. þingmaður. Þegar við horfum t.d. á þróun húsnæðisverðs og yfirleitt á þróunina hér á höfuðborgarsvæðinu þá getum við alveg séð sömu þróun í höfuðborgum t.d. hinna Norðurlandanna. Við sjáum að íbúðaverð t.d. í Kaupmannahöfn er að falla í verði. Það hefur verið mikill vöxtur og nú er verð á mikilli niðurleið. Þannig að ég held að það sé ekki svo einföld skýring. En hv. þingmaður spyr: Hvað með umræðuna í Noregi? Ég sagði áðan að ég hefði tröllatrú á EES-samningnum. Auðvitað er Noregur stór hluti af því að samningurinn er til staðar þannig að ég skal alveg viðurkenna, og ég held að við eigum alltaf að fara í kalt hagsmunamat, að ef Noregur myndi taka þá ákvörðun núna í þriðja skiptið að leggja fyrir norsku þjóðina að ganga í Evrópusambandið, því að Norðmenn hafa þegar tvisvar sinnum sagt nei við því, ef þeim myndi allt í einu snúast hugur núna og vilja gera það, þá getur vel verið að það myndi hafa áhrif á EES-samninginn. Það myndi þar af leiðandi hafa þau áhrif að við þyrftum að taka aftur upp það hagsmunamat sem hingað til hefur farið fram í mínum huga og hjá fleirum sem segja að EES-samningurinn sé okkar besta leið í utanríkisviðskiptum og utanríkissamstarfi.