safnalög o.fl.
Frú forseti. Ég þakka hv. þingmanni fyrir svarið. Þetta fannst mér alls ekki skýrt. Má skilja sem svo að þetta muni ekki gilda um þá sem eru nú þegar í þessum stöðum? Að ef einhver hefur setið í sínum stól í tíu ár og er skipaður á ný ef staða hans hefur verið auglýst, sem er allur gangur á, þá geti verið að eftir fimm ár fái hann fimm ár í viðbót? Að við sætum uppi með sama forstöðumann menningarstofnunar í tíu ár í viðbót þannig að sami einstaklingur væri þar mögulega í 20 ár?
Af hverju er ég að biðja hv. þingmann um að vera skýran með þetta? Vegna þess að nefndarálitið er mjög óskýrt. Það tekur ekki á þessu. Þetta getur skipt mjög miklu máli af því að þetta eru réttindi fólks. Við þurfum að vita það nákvæmlega. Ég spyr að auki: Hvers vegna fer meiri hlutinn þá leið að gera þetta svona þegar við höfum verið að þróa samfélagið í hina áttina í hinum ýmsu lagabálkum, þar sem hefur verið sett inn skýr tveggja tímabila regla — tvisvar sinnum fimm ár — til að tryggja að það sé endurnýjun í viðkvæmum stöðum sem kalla á að þar sé endurnýjun, bæði í viðkvæmum stöðum sem varða einstaklingsrétt en líka við menningarstofnanir? Við erum með svona í fjölmörgum menningarstofnunum. Þar hefur ekki verið farin sú leið að undanskilja einhverja heldur hefur verið tekin ákvörðun um þetta. Hvers vegna tekur meiri hlutinn allt í einu ákvörðun um að fara aðra leið með þá sem sitja nú þegar í embættum? (Forseti hringir.)