05.03.1979
Neðri deild: 59. fundur, 100. löggjafarþing.
Sjá dálk 2954 í B-deild Alþingistíðinda. (2348)

148. mál, orlof

Félmrh. (Magnús H. Magnússon):

Herra forseti. Frv. þetta er eitt af allmörgum frv. sem flutt eru í samræmi við þau fyrirheit sem ríkisstj. gaf launþegasamtökunum um umbætur í félags- og réttindamálum samfara setningu laga um tímabundnar ráðstafanir til viðnáms gegn verðbólgu, nr. 103 frá 30. nóv. s. l.

Það hefur viljað brenna við að þegar launþegi ætlar að fara í sumarfrí fær hann ekki útborgað orlofsfé sitt vegna þess að vinnuveitandi hans hefur ekki gert skil á því til Póstgíróstofunnar. Þetta er sem betur fer ekki algengt, en ákaflega hvimleitt og óþægilegt fyrir þá sem í slíku lenda. Með breyt., sem gerð er á reglugerð um orlof samhliða lögfestingu þessa frv., er algerlega sett undir þennan leka. Nú verður skylt að greiða launþeganum út orlofsfé hans þegar hann hyggst taka sér frí, jafnvel þótt launagreiðandi hafi ekki skilað því til Póstgíróstofunnar. Auk þessarar reglugerðarhreytingar er svo gerð breyt. á lögum um orlof sem nauðsynlegt er að ráðast í samhliða. Þar er Póstgíróstofunni eða öðrum innheimtuaðila orlofsfjár veitt heimild til að krefjast aðgangs að bókhaldsgögnum launagreiðanda ef slíkt er nauðsynlegt til að staðreyna upplýsingar um greitt eða vangreitt orlofsfé.

Viðræður hafa farið fram við Póstgíróstofuna annars vegar og Seðlabankann hins vegar um hækkun þeirra vaxta, sem greiðast af orlofsfé. Þeir hafa fram að þessu verið aðeins 5%, sem dugir skammt í þeirri verðbólgu sem við höfum búið við. Í þessum viðræðum hefur komið fram, að nettóvextir, þegar búið er að draga frá rekstrarkostnað Póstgíróstofunnar, munu a. m. k. rúmlega tvöfaldast og er hugsanlegt að hægt sé að ná þar meira fram.

Herra forseti. Ég legg til að þessu frv. verði að lokinni þessari umr. vísað til 2, umr. og félmn. og vona að þar hljóti það skjóta afgreiðslu.