25.03.1980
Sameinað þing: 36. fundur, 102. löggjafarþing.
Sjá dálk 1375 í B-deild Alþingistíðinda. (1375)
121. mál, greiðslur vegna Búnaðarþings
Karl Steinar Guðnason:
Herra forseti. Í svörum við þessari fsp. hefur komið í ljós hvílíkur hofmóður fylgir oft þeim mönnum sem ræða um landbúnaðarmál og þykjast vilja verja þá stefnu sem rekin hefur verið í þjóðfélaginu á undanförnum árum í þeim efnum.
Ég vil taka undir það, sem fyrirspyrjandi kom inn á áðan, að það er í hæsta máta óeðlilegt að ein stétt njóti þess að hafa þing á fullum launum hjá ríkinu. (Gripið inn í; Ein stétt?) Búnaðarþing, er það ekki? Já, það eru aðeins bændur sem þangað kjósa. Þetta skiptir tugum millj. Ég hygg að kalla mætti það óþrif að fara svona með fjármuni. Það skiptir engu máli hvort það hafi verið gert í áratugi eða ekki, það á að afnema svona lagað á meðan aðrir njóta þess ekki líka. Hvað með Sjómannasamband Íslands eða Landssamband ísl. útvegsmanna? Mér er kunnugt um að á þeirra þingum er fjallað um fiskveiðistefnu og löggjöf einnig — þá löggjöf sem snertir félagsleg málefni sjómanna og einnig löggjöf er snertir útvegsmenn. Það vill nú svo vel til, að ég hef lesið allar ályktanir og samþykktir og erindi Búnaðarfélagsins og mér sýnist ekki að þar hafi neitt merkilegra skeð en skeður á almennum þingum öðrum, eins og t.d. Sjómannasambandsþingi og þingi Landssambands ísl. útvegsmanna.
Ég vil að fram komi hér að mér finnst þetta óeðlilegt og úr því að verkalýðssamtökin eða þing annarra greina njóta ekki þessara forréttinda á að fella þau niður.