16.12.1980
Efri deild: 32. fundur, 103. löggjafarþing.
Sjá dálk 1529 í B-deild Alþingistíðinda. (1582)

112. mál, skráning lífeyrisréttinda

Fjmrh. (Ragnar Arnalds):

Herra forseti. Ég mæli hér fyrir frv. til laga um skráningu lífeyrisréttinda, en frv. þetta hefur þegar verið afgreitt af Nd.

Frv. samhljóða þessu frv. var lagt fyrir seinasta þing, en varð þá ekki útrætt. Það voru raunar þrjú frv. sem þá voru flutt hér um lífeyrissjóðamál, en aðeins eitt þeirra afgreitt. Nú eru tvö þau sem eftir sátu til lokaafgreiðslu hér í þinginu, þ.e. þetta frv. um skráningu lífeyrisréttinda og frv. um Söfnunarsjóð lífeyrisréttinda.

Lífeyrissjóðir, viðurkenndir af fjmrn. eða lögbundnir, eru nú um 95 talsins. Engin heildarskrá er til í landinu um hverjir eiga aðild að þessum sjóðum og því síður hvaða réttindi menn eiga sem í þessum sjóðum eru.

Fjmrn. hefur að undanförnu unnið að því að safna saman efni í skrá um lífeyrisréttindi landsmanna. Þýðingarmesta framlagið til slíkrar skrár hefur komið frá Sambandi almennra lífeyrissjóða, en þetta samband hefur gert samnafnaskrá fyrir alla sjóði innan sambandsins. Biðreikningur lífeyrissjóðsiðgjalda hefur nú tengst þeirri skrá í samræmi við sérstakt samkomulag sem gert var við sambandið.

Frv. um skráningu lífeyrisréttinda er flutt til þess að tryggja með lögum greiðan aðgang almennings að upplýsingum um lífeyrissjóðsaðild og til að afla vitneskju um umfang þess tryggingakerfis sem lífeyrissjóðirnir mynda í landinu.

Það er nokkuð ljóst, að framkvæmd laga um starfskjör launþega og skyldutryggingu lífeyrisréttinda, sem samþykkt voru á s.l. vori, byggjast á því, að unnt sé að kanna hvort iðgjöld hafi verið greidd svo sem samningar og lög segja til um.

Herra forseti. Ég sé ekki ástæðu til að fjölyrða um þetta frv. Nánari grein er gerð fyrir því í grg. og í athugasemdum með frv., en ég vil leyfa mér að leggja til að að lokinni þessari umr. verði málinu vísað til hv. fjh.- og viðskn.